بقلم الكاتبة بثينة المدني : ملاحظات شخصيّة …

بعيد عالشعبويات و الطوباويات، تونس ولات ماكينة متع كفاءات تجيب و تكبر و يمشيو شباب نوارات و كل مرة تشدهم الغصة في الغربة و يقولو كان جات بلادنا تحبنا رانا ماناش مطيشين في قاع الدنيا.

مانيش je dramatise les choses اما في بلادنا الي فيه الضو و ينجم يصلح حتى بالقليل يمحقوه و يدخلو الناس الكل ضدو خاطرهم ياما ما خمموش في الأفكار متاعو و ما وصلوش يطبقوها والا ساكتين كي الدجاج و كل واحد يخاف على خبزتو و غلاو الخبز على الأخرين.

و بعد يجيو في الاعلام و يحكيو على هجرة الأدمغة و يتأسفو و يصفقو و وفات المسرحية و يا ناس ما كان باس.

الحرقة (الهجرة غير الشرعية) ماعادش ظاهرة ولات مشكلة اقليمية و كل مرة تتطور.

تعمل دورة صغيرة في الشوارع تحس فما vibe متع موت.

البلاصة الي تربيت فيها طول حياتك قاعدة تذبل و تهز بالكركارة أطلال الشعب الي مزال و لكلو جرت عباد غرفت كيما حبت و ماهمش هوني.

غلاء الأسعار ولا موضوع مستهلك و من نهار لنهار خرجت الأمور عن السيطرة.

ما نحكيوش عالخماضة متع المناخ الدكتاتوري الي قاعدة تخيم عالبلاد و تونس الي كانت حافلة بمكوناتها و أحزابها و جوها اليوم خمدت و الدخان طالع.

ربي يجريها على صلاح و للحديث بقية.