بقلم المدون ذاكر بنصوف : هواء منوبة وغلّة قبلي … ( صور)
في إتّصال وتعقيبا على تدوينتي السابقة :
هاك العام الباي متاع #تونس راقتلو باش يبني قصر في بلاصة الهواء متاعها صحّي برشة .. مختصر الحديث المستشارين متاعه قالوله عليك بحمام الأنف وإلا منوبة هواهم ما كيفوش … عيّط للطبيب متاعه باش يشير عليه السيد الطبيب ڨالّه إذبح علوش في حمام الأنف وعلوش في منوبة وطيشهم في العراء اللي يجيف بعد خوه هاضاكا راهو هواه صحي برشة … مختصر الحديث علوش حمام بعد ثلاثة أيام طلعت ريحته وبالنسبة لعلوش منوبة فات أسبوع كامل واللحم باقي كيما ذبحوه أول مرة … هاكا علاش البايات وخدامهم وعساكرهم بكلهم شيدوا قصورهم في جهة منوبة ويقدر عددهم تقريبا ب30 قصر مازال موجود منهم تقريبا عشره … حكيت على هوى منوبة وجودته لكن اللي ما يعرفوشي #التوانسة أنّو هواء الصحراء وماء الصحراء وأرض الصحراء لا كيفهم لا هواء منوبة ولا ماء زغوان ولا أرض فريڨة … جربوا هزّوا صغاركم للصحراء أسبوع واحد وشوف هاك الندوة وهاك البلغم والبرد والروماتيزم تنسوه ويولي من الماضي … أشكون جرّب ردم روحه في عرڨ #قبلي وإلا في #الصابرية … أشكون فيكم ذاق ماء عيون جمنة و ليماڨس والنبش وغريب… براس أمكم أشكون منكم ذاق بطاطا وڨرع وطماطم بشني والمطروحة وغيدمة … أقسم بالله أحلى من العسل والسكر … أشكون ذاق بطيخ ودلاع زعفران … هاك العام إستدعاني فلاح معروف في قبلي لبيروه وقدّملي سبت متاع خوخ لا عمري شفته ولا عمري ذقت في حلاوته … ما عندكمش علاش تحلفوني كعبة الخوخ حمراء كيف خدود الطفلة أكبر من كعبة طومسون وقالي تعرفش الخوخ هذا منين ؟؟ قتله أكيد من إسبانيا خاطرك مركانتي وتصدّر وتورًد من أوروبا قالي والله العظيم هاذيكا غلّة المزرع الجديد متاعي في قلب الصحراء بيولوجي صرف لا أمونيتر ولا أمونياك ولا دواء مرشوش ولا زيت فران ولا ماء باطري … #الحاصيلو إعملت مقارنة بين هواء #منوبة وغلّة قبلي حتى نقوللكم اللي مستعد ندخل في رهان مع أي غلة أخرى من أي جهة في الجمهورية سواء من حيث اللذة والحلاوة وإلا من ناحية الصفاوة البيولوجية أو من حيث أناهي الغلّة اللي تخمج قبل … سيدي خويا برة جرّب غلّة قبلي ومن بعد أعطيني رأيك …..
